|
 18.01.2012 დღეს, საქართველოს ვიცე-პრემიერი/ სახელმწიფო მინისტრი რეინტეგრაციის საკითხებში, ქ-ნი ეკა ტყეშელაშვილი შეხვდა არასამთავრობო სექტორის წარმომადგენლებს.  
06.01.2012 ვიცე პრემიერი/რეინტეგრაციის საკითხებში სახელმწიფო მინისტრი, ულოცავს სომეხთა სამოციქულო წმინდა მართლმადიდებელი ეკლესიის მრავალრიცხოვან მრევლს მაცხოვრის შობისა და ნათლისღების ბრწყინვალე დღესასწაულებს. "მინდა მოგილოცოთ ქრისტეშობისა და ნათლისღების ბრწყინვალე დღესასწაულები და ყველა ოჯახს ვუსურვო ბედნიერება, წარმატება და კეთილდღეობა. 2012 წელი იყოს წარმატებული და ნაყოფიერი ჩვენი ხალხებისათვის", - განაცხადა ქ-მა ეკა ტყეშელაშვილმა. 
25.12.2011 ვიცე პრემიერი/რეინტეგრაციის საკითხებში სახელმწიფო მინისტრი, ქალბატონი ეკა ტყეშელაშვილი, ულოცავს კათოლიკური ეკლესიის მრავალრიცხოვან მრევლს მაცხოვრის შობის ბრწყინვალე დღესასწაულს. "მინდა მოგილოცოთ ქრისტეშობის ბრწყინვალე დღესასწაული და ყველა ოჯახს ვუსურვო ბედნიერება, წარმატება და კეთილდღეობა. კათოლიკები ჩვენი მრავალკონფესიური და მრავალეთნიკური ქვეყნის განუყოფელი ნაწილია და ეს ურთიერთობები საუკუნეებს ითვლის. ჩვენთვის ქრისტეს შობა ნიშნავს სიყვარულის დღესასწაულს და მშვიდობის ხარებას. 2012 წელს მოეტანოს ჩვენი ქვეყნისათვის მშვიდობა, სიძლიერე და წარმატება." 
24.12.2011 24 დეკემბერს, ახმეტის მუნიციპალიტეტის ორგანიზებითა და რეინტეგრაციის საკითხებში სახელმწიფო მინისტრის აპარატის თანამონაწილეობით ჩატარდა პანკისის ხეობის ეთნოგრაფიული მუზეუმის პრეზენტაცია-გახსნა. მუზეუმი მდებარეობს პანკისის ხეობის სოფელ დუისში. მუზეუმი დაფუძნდა 2010 წელს, ქ. ახმეტის მუნიციპალიტეტთან არსებული კულტურის ცენტრის ინიციატივით და ვიცე-პრემიერის/რეინტეგრაციის საკითხებში სახელმწიფო მინისტრისა და კახეთის მხარეში პრეზიდენტის რწმუნებულის შუამდგომლობით. პანკისის ხეობის მხარეთმცოდნეობის მუზეუმის მიზანია პანკისის ხეობაში მცხოვრები სხვადასხვა ეთნიკური ჯგუფების - თუშების, ქისტების, ფშავლებისა და ოსების - კულტურისა და თვითმყოფადობის წარმოჩენა, ყოფა-ცხოვრების ასახვა, მათი ისტორიული მემკვიდრეობის გადარჩენისა და განვითარების ხელშეწყობა. მუზეუმის მიზანია ასევე საერთო კავკასიური კულტურის უკეთ გაცნობა, ხეობაში ტურისტების მოზიდვა და აგროტურიზმის განვითარების ხელშეწყობა, ასევე, ხეობაში მცხოვრები სხვადასხვა ეთნიკური ჯგუფის ერთმანეთთან და ქართულ საზოგადოებაში ინტეგრაცია. რეინტეგრაციის საკითხებში სახელმწიფო მინისტრის აპარატმა პანკისის ხეობის ეთნოგრაფიულ მუზეუმს საჩუქრად გადასცა კომპიუტერი, პრინტერი და საკანცელარიო ნივთები. 
23.12.2011 23 დეკემბერს, მთავრობის კანცელარიის შენობაში, საქართველოს ვიცე-პრემიერმა/რეინტეგრაციის საკითხებში სახელმწიფო მინისტრმა და მინისტრის პირველმა მოადგილემ ჩაატარეს სახელმწიფო უწყებათაშორისი კომისიის სხდომა. "შემწყნარებლობისა და სამოქალაქო ინტეგრაციის ეროვნული კონცეფციისა და სამოქმედო გეგმის განხორციელების მიზნით შექმნილი სახელმწიფო უწყებათაშორისი კომისიის" 2011 წლის შემაჯამებელი სხდომა გაიმართა ქ-ნი ეკა ტყეშელაშვილის თავმჯდომარეობით. სხდომაზე განხილულ იქნა 2011 წლის სამოქმედო გეგმით განხორციელებული აქტივობები. ქალბატონი ეკა მიესალმა კომისიის მიერ გაწეულ სამუშაოს და მის წარმატებულ ფუნქციონირებას. სახელმწიფო მინისტრმა განაცხადა, რომ რეინტეგრაციის საკითხებში სახელმწიფო მინისტრის აპარატი 2012 წლის განმავლობაშიც აქტიურად გააგრძელებს შემწყნარებლობისა და სამოქალაქო ინტეგრაციის ეროვნული კონცეფციისა და სამოქმედო გეგმის განხორციელების კოორდინაციას. კომისიის წევრებმა, რომლებიც სხვადასხვა უწყებას წარმოადგენენ, მიმოიხილეს შესაბამის სფეროებში გატარებული ღონისძიებები. მათ აღნიშნეს წლის განმავლობაში ეთნიკური უმცირესობებით დასახლებულ რეგიონებში კულტურული ღონისძიებების, უმაღლესი განათლების ხელმისაწვდომობის, რეგიონების ცენტრთან ეკონომიკური დაახლოების, დასაქმების, ინფრასტრუქტურის განვითარების, სოფლის მხარდაჭერის, ჯანდაცვისა და სოციალური პროექტების შესახებ ინფორმაციის ხელმისაწვდომობის, სახელმწიფო ენის სწავლების და სხვა მიმართულებებით მიღწეული წარმატებები. კომისიის წევრებმა კმაყოფილება გამოხატეს არასამთავრობო სექტორთან ნაყოფიერ თანამშრომლობასა და კომისიის წევრებს შორის მჭიდრო კოორდინაციის არსებობასთან დაკავშირებით.     
21.12.2011 ვიცე პრემიერმა/რეინტეგრაციის საკითხებში სახელმწიფო მინისტრმა, ქალბატონმა ეკა ტყეშელაშვილმა ებრაელ ხალხს ხანუქას დღესასწაული მიულოცა. "მინდა ვუსურვო ებრაელ ხალხს მშვიდობა ისრაელის წმინდა მიწაზე, წარმატებები და იმედი გამოვთქვა, რომ ჩვენს ხალხებს შორის ურთიერთობები იქნება ორი დამოუკიდებელი სახელმწიფოს თავისუფლების, მშვიდობის და გამარჯვების გარანტი" - აღნიშნა თავის მიმართვაში ქ-ნმა ეკა ტყეშელაშვილმა. ხანუქას ბრწყინვალე დღესასწაული უძველესი და უდიდესია იმ დღესასწაულებს შორის, რომელსაც ებრაელი ხალხი აღნიშნავს, ის რწმენის სიმტკიცისა და ტრადიციების განახლების სიმბოლოა. |
    
|
მინისტრის ხედვა
