შეხვედრაზე განხილულ იქნა ოკუპირებულ რეგიონებში არსებული მდგომარეობა და აფხაზეთისა და ცხინვალის რეგიონის მიმართ საქართველოს სახელმწიფო სტრატეგია "ჩართულობა თანამშრომლობის გზით" და მისი სამოქმედო გეგმა. ბ-ნმა ირაკლი ფორჩხიძემ ჩეხ სტუმარს გააცნო ჩართულობის სამოქმედო გეგმის მიმდინარე პროექტები ჯანდაცვის, განათლებისა და საზოგადოებათშორისი კონტაქტების მიმართულებებით. შეხვედრის მსვლელობისას, ჩეხეთის საგარეო საქმეთა მინისტრის პირველმა მოადგილემ მხარდაჭერა გამოხატა ოკუპირებული რეგიონების მიმართ საქართველოს პოლიტიკის მიმართ.

რეინტეგრაციის საკითხებში საქართველოს სახელმწიფო მინისტრი შეხვდა გერმანიის ფედერაციული რესპუბლიკის საგარეო საქმეთა რწმუნებულს აღმოსავლეთ ევროპის, სამხრეთ კავკასიისა და შუა აზიის საკითხებში პატრიცია ფლორს, რომელიც 2006-2010 წლებში საქართველოში გერმანიის ელჩი იყო, და გერმანიის ელჩს საქართველოში ორთვინ ჰენიგს. შეხვედრაზე განიხილეს ოკუპირებულ რეგიონებში არსებული სიტუაცია, ბოლო დროს განვითარებული მოვლენები და საქართველოს მთავრობის ჩართულობის სტრატეგიის განხორციელების საკითხები. ვიზიტის ფარგლებში, პატრიცია ფლორმა შეხვედრები გამართა ასევე საგარეო საქმეთა მინისტრთან, განათლების მინისტრთან და სამოქალაქო საზოგადოების წარმომადგენლებთან. აღსანიშნავია, რომ 2012 წელს საქართველოსა და გერმანიას შორის დიპლომატიური ურთიერთობების დამყარების 20 წლისთავი აღინიშნება.

ესპანეთის დეპუტატთა კონგრესის საგარეო ურთიერთობათა კომიტეტის თავმჯდომარე, ბატონი ჟოზეფ ანტონი დურან ი ლეიდა საქართველოს ორდღიანი ვიზიტით ესტუმრა. ვიზიტის ფარგლებში განხორციელდა შეხვედრები ასევე საქართველოს პარლამენტში, საქართველოს პრეზიდენტთან და საგარეო საქმეთა სამინისტროში. სახელმწიფო მინისტრმა ესპანელ სტუმარს გააცნო ოკუპირებული რეგიონების მიმართ საქართველოს პოლიტიკა.

საქართველოს მთავრობის კანცელარიაში გამართული შეხვედრა მიუნხენისა და ზემო ბავარიის სავაჭრო პალატების საქართველოსა და თურქეთში სავაჭრო მისიის ფარგლებში განხორციელდა. გერმანულ დელეგაციას ხელმძღვანელობდა დოქტორი ანტონ კათრაინი. ვიცე-პრემიერმა სტუმრებს გააცნო საქართველოში გატარებული რეფორმები და ისაუბრა ევროკავშირთან ქვეყნის დაახლოებისა და ნატო-ში ინტეგრაციის პროგრესზე. ეკა ტყეშელაშვილმა ხაზი გაუსვა, რომ მიუხედავად ქვეყნის ტერიტორიის ნაწილის ოკუპაციისა, საქართველო აგრძელებს სწრაფი ტემპებით განვითარებას.

შეგახსენებთ, რომ ნეიტრალური სამგზავრო დოკუმენტი და ნეიტრალური პირადობის მოწმობა წარმოადგენს ჰუმანიტარული ხასიათის საბუთს, რომელიც აფხაზეთისა და ცხინვალის რეგიონების მოსახლეობას სოციალური სერვისების მიღებისა და საზღვარგარეთ თავისუფლად გადაადგილების საშუალებას აძლევს.